Nú eru minni enn tvey samdøgur eftir, til fyrsta skotið verður latið av fyri Eysturoyartunlinum. Stóra løtan verður á Strondum týsdagin klokkan 14, og tað verður landsstýrismaðurin í samferðslumálum, Henrik Old, sum fer at lata fyrsta skotið av.
Fólk í Sjóvar kommunu ætla ikki at lata henda dagin fara afturvið borðinum uttan "markering". Tey vænta økt virksemi í kommununi í tíðini fram til, at tunnilin kemur.
Handils-og vinnulívið í økinum fegnast um útlitini til økt virksemi, og nú fyrsta skotið verður latið av, hava fyritøkur ymisk tunnilstilboð. Hetta verður soleiðis fyrsti veruligi tunnilsdagur í Sjóvar kommunu.
Millum fyritøkur, sum fara at bjóða sertiboð á tunnilsdegnum, eru Stranda Máling, Snældan, Stranda Centrum og Effo. Harumframt verður Atelierið hjá Finleifi Mortensen, undir Torvbrekku 12b, opið hendan dagin til klokkan 18.
- Eftir at hátíðarhaldið við tunnilsmunnan á Strondum er av seinnapartin týsdagin, verður bjóðað niðan í Bygdarhúsið til ein góðan kaffimunn við onkrum góðum aftur við, vita tey í Sjóvar kommunu at siga.
