Hondbóltur
Spenningurin er kanska ikki heilt tann sami nú, sum hann vónandi verður seinni á kappingarárinum. Men kortini munnu tað vera mong hondbóltsáhugað, sum gleða seg til fyrsta samanbrestin millum mansliðini hjá Kyndli og VÍF. Umframt at vera klassiskarin í føroyskum hondbólti, er talan eisini um meistaraliðini frá teimum báðum seinastu árunum, sum tørna saman, og í so máta kann dysturin fara at geva eina góða ábending um, hvussu tey bæði liðini eru fyri í nýggja kappingarárinum.
Tveir aðrir dystir verða eisini í manskappingini um vikuskiftið. StÍF skal annað vikuskiftið á rað til Havnar, og hesa ferð er tað í Hoyvíkarhøllini, at teir skulu royna seg. Somuleiðis skal Neistin spæla í Hoyvíkarhøllini, sum enn er heimavøllur hjá KÍF. Tann dysturin skuldi longu spælast fríggjakvøldið.
Styrkisroynd í Vági
Hjá kvinnunum er eingin ivi um, at mest spennandi dysturin tykist vera tann í Vági. Har taka meistararnir úr VB móti Neistanum, sum í ár tykist vera ein av avbjóðarunum til gullið, og so er spurningurin, hvussu tann styrkisroyndin fer at fella út.
Eisini í Havn tykist talan gerast um spennandi uppgerð, tá VÍF vitjar Kyndil. Tey flestu munnu rokna við, at tað verður annað av hesum, sum fer at sníkja seg við í endaspælið, og í so máta er eisini talan um áhugaverda styrkisroynd her.
Á Giljanesi skal StÍF á vitjan, og er hetta ein dystur millum tvey av liðunum, sum hava meldað út, at tað í ár skal roynast við lokalu kreftunum, og loksins skal Stjørnan á vitjan í Runavík.
