Lene Moyell Johansen, sum hevur viðgjørt hetta málið hjá Ríkisumboðnum, vil ikki gera nakrar viðmerkingar til ítøkiliga málið. Hon hevur tagnarskyldu.
Hon vil tó siga so mikið, at hon er sannførd um, at avgerðin var røtt út frá galdandi lóggávu.
Eftir tilmæli frá tí føroyska adopsjónssamráðnum, ið er samansett av einum lækna, einum løgfrøðingi og einum sosialráðgeva, tók Ríkisumboðið avgerðina um, at góðkenningin til at ættleiða skuldi fella burtur, og henda avgerð varð staðfest í donsku adopsjónsnevndini, har 10 fólk sita. Átta av hesum umboða ymiskir fakbólkar. Fýra limir umboða læknavísindi- pædiatri, intern medisin, psykiatri og barna- og ungdómspsykiatri, ein limur er sálarfrøðingur, ein limur er sosialráðgevi, tveir limir eru løgfrøðingar, meðan tveir limir eru leikfólk – formaðurin er landsrættardómari.
- Hetta var ein ógvuslig avgerð við stórum menniskjaligum avleiðingum, so tað hevur sjálvsagt ikki verið nøkur løtt avgerð at taka. Ríkisumboðið kann ikki upplýsa, hvat var orsøkin til, at eitt so ógvusligt stig varð tikið, sigur Lene Moyell Johansen.
Sambært Dan Knudsen, ríkisumboðsmanni, hevur einki slíkt mál nakrantíð áður verið í Føroyum, men tað er hent fyrr í Danmark.
