Polestar-deildin (menn):
Mikukvøldið kl. 19 verður fyrsta FM-finalan millum SÍ og Mjølnir spæld í ítróttarhøllini á Giljanesi, sum SÍ brúkar sum heimavøll í finalunum, tí lítla høllin í Sørvági ikki er góðkend til finalur.
Fríggjakvøldið verður so onnur finalan spæld í Klaksvík. Hava liðini tá vunnið hvør sína finalu – sama hvat settmunurin er – verður ein triðja og avgerandi finala spæld á heimavøllinum hjá SÍ, sum eigur tann fyrimunin, tí SÍ var nummar eitt í sjálvari landskappingni.
Sostatt er leisturin, sum spældur verður eftir, broyttur, samanborið við, hvussu spælt hevur verið síðani 2016, tá meistaraheitið varð avgjørt við einum gullsetti upp í 15, um liðini høvdu vunnið hvør sína finalu.
Nú er leisturin nærri honum, sum brúktur var frá fyrstu finalunum í 2010, tá eisini varð spælt best av trimum dystum. Tey seks árini hendi tað tvær ferðir, at neyðugt varð við einari triðju finalu; í 2015, tá TB vann triðja finaludystin 3-0 á Drátti í kvinnudeildini, og so fyrstu ferð FM-finalur vórðu spældar í flogbólti í 2010, tá menninir hjá SÍ vunnu triðja finaludystin 3-0 á Mjølni, eftir at bæði liðini høvdu vunnið hvør sín dyst 3-2.
Men fáa vit so sama spenning aftur hesa ferð, sum vit fingu í 2010?
Við úrslitunum í ár í huga, so halda tey flestu, sum halda seg hava skil fyri flogbólti, at SÍ er favorittur at gerast føroyameistari hesa ferð, tí SÍ hevur vunnið tríggjar av teimum fýra dystunum teirra millum í landskappingini. Mjølnir vann tann eina dystin 3-2 í Klaksvík, men hinar tríggjar dystirnar vann SÍ 3-0.
Phil Freere úr Mjølni viðgekk eisini fyri 3-2 í Kringvarpinum, at SÍ væl og virðiliga hevði verið besta liðið í kappingini, men vísti kortini á, at í lítlu høllin í Sørvági fekk Mjølnir ikki nyttu úr góðu hoppservunum, liðið hevur, og at tær kundu fara at gera Mjølnir meira kappingarført í stóru høllini á Giljanesi.
Mjølnir hevur annars verið føroyameistari seinastu seks árini, men í fjør var um reppið, at meistaraheitið ikki endaði í Sørvági, men Mjølnir vann gullsettið 15-9. So er spurningurin um SÍ hesa ferð megnar at koppa Mjølni av trónuni. SÍ hevur ikki verið føroyameistari síðan 2017.
FM-finalur 2025 í Polestar-deildini:
1. FM-finala: SÍ - Mjølnir
Mikudagin 19. mars kl. 19:00 á Giljanesi
2. FM-finala: Mjølnir – SÍ
Fríggjadagin 21. mars kl. 19:30 í Badmintonhøllini í Klaksvík
Vinna liðini hvør sín dyst - sama hvat settmunurin er - verður triði og avgerandi finaludysturin spældur á Giljanesi. Dagfesting verður ásett seinni.
