Tað gongur søguliga illa hjá brasilska fótbóltslandsliðnum.
Fyri fyrstu ferð nakrantíð í søguni hevur Brasil tapt tríggjar HM-undankappingardystir á rað.
18. juni tapti Brasil 0-2 fyri Uruguay á útivølli, og farna fríggjakvøld tapti Brasil 1-2 fyri Kolumbia á útivølli.
Í nátt føroyska tíð skuldi gongdin vendast á heimavølli móti erkafíggindanum, Argentina.
Men Argentina syrgdi fyri enn meiri neiligari søguskriving hjá Brasil.
Argentina vann nevnliga dystin 1-0 við einum máli verjuskansin, Nicolás Otamendi skoraði tá 63 minuttir vóru leiktir. Talan er um fyrsta tapið hjá Brasil á heimavølli í einari HM-undankapping í 69 ár. Og tað svíður eyka hjá brasiliumonnum, at tapið er fyri Argentina.
Argentinar feiraðu sigurin næstan líka nógv sum tá teir vunnu HM-gull í Katar í fjør.
Brasil er nummar seks í HM-undankappingini í Suðuramerika við sjey stigum fyri seks dystir. Tað er nakað sum eingin hevði væntað.
Tó sleppa heili seks av teimum 10 suðuramerikonsku landsliðunum til HM-endaspælið í Meksiko, USA og Kanada í 2026, so Brasil fer helst at klára tað, men lagið í tí fótbóltsøra suðuramerikanska landinum er út av lagi vánaligt.
Darwin Nunez hevur yvirtikið leiklutin hjá Luis Suarez sum tann stóri málskjúttin hjá Uruguay. Nunez skoraði tvey mál tá Uruguay á heimavølli vann 3-0 á Bolivia.
Støðan aftaná seks umfør:
1. Argentina 15 stig
2. Uruguay 13 stig
3. Kolumbia 12 stig
4. Venesuela 9 stig
5. Ekvador 8 stig
6. Brasil 7 stig
--------------------
7. Paraguay 5 stig (nr. 7 skal spæla Play Off dystir)
--------------------
8. Chile 5 stig
9. Bolivia 3 stig
10. Peru 2 stig
