Stórur áhugi tykist vera hjá trolarum og línuskipum at sleppa á Flemish Kap at royna.
Fiskimálaráðið hevur úr at gera við at skriva út fiskiloyvi, og higartil hava heili 13 skip fingið fiskiloyvi til føroysku toskakvotuna, sum í ár er 3154 tons.
Í gjár fingu trolararni Sjagaklettur, Gullberg, Niels Pauli og Steintór loyvi á Flemish Kap, umframt línuskipini Sandshavið, Helena, Kambur og Stapin. Hesi átta skip koma afturat Vesturleika, Váðasteini, Eysturoyingi, Sigmundi og Mascot, sum fingu síni loyvi upp á pláss undan vikuskiftinum.
Tað merkir, at tilsamans fimm trolarar úr bólki-2 og átta línuskip úr bólki-3 hava fingið fiskiloyvi á Flemish Kap.
Talan er um felagskvotu, og merkir tað at frítt er at fiska, til øll kvotan er uppi.
Sambært kunngerðini, ið varð lýst í síðstu viku, hava trolarar í bólki-2 og línuskip í bólki-3 fyrsta rætt at søkja um at sleppa á Flemish Kap.
Tað hevur elvt til politiskt rumbul, at landsstýrismaðurin í fiskivinnumálum í ár hevur valt at býta toskakvotuna til aðrar enn flakatrolararnar. Argumentið hjá Jacob Vestergaard er, at flakatroalrarnir hava eina munand størri kvotu at dúva uppá í Barentshavinum í ár, sammett við undanfarin ár. Tí skal kvotan á Flemish Kap í staðin latast øðrum skipabólkum, sum hava størri tørv á nýggjum inntøkumøguleikum, sigur landsstýrismaðurin.
