Amerikonsku myndugleikarnir hava funnið ein tunnil, sum rúsevnaharkalið hava brúkt til at smugla rúsevni ígjøgnum úr Meksiko til USA. Samstundis hava amerikanskir og meksikanskir tollarar lagt hald á 13 tons av marihuana, og tvey fólk eru tikin.
BBC sigur, at tunnilin var ímillum eitt vøruhús í Tijuana í Meksiko og ein goymslubygning í Otay Mesa har suðuri í Kalifornia. Tunnilin er góðar 360 metrar langur, og har er bæði ljós og luftskipan.
Amerikanska innflytara- og tollverkið ICE sigur, at stovnurin hevur vunnið ein týðandi sigur á teimum meksikonsku rúsevnaharkaliðunum, sum standa fyri smuglingini um markið til USA.
