Maðurin, sum varð funnin deyður í Fjøllunum omanfyri Gjógv í gjárkvøldið, er helst dottin og er deyður av løstinum hann fekk av fallinum.
Tað sigur Løgreglan. Tað er staðfest, at maðurin hevur smekkað høvdið í, tí hann hevði skaða í tinninginum, og metingin hjá løgreglini er, at hann hevur verið áhaldsin og er dottin, og hevur smekkað høvdið í.
Hann var annars vanur fjallaklintrari og var ein av oddamonnunum í einum bretskum felagi fyri klintrarar
Tað er heldur onki at ivast í, at talan er um tann 58 ára gamla bretan, sum varð eftirlýstur í gjár. Les meiri um tað við at trýsta HER
Eftir at hann var eftirlýstur, fekk løgreglan nógvar fráboðanir og ein av teimum var frá einum manni, sum hevði sæð okkurt blátt liggja í haganum undir Miðdagsfjalli. Tá ið tað varð kannað, vísti tað seg at vera ein ryggsekkur og í ryggsekkinum var telefonin og eitt navnakort hjá saknaða mannininum. Og skamt haðani frá varð so líkið eisini funnið.
Nú verður líkskoðan og samstundis er løgreglan farin í hagan við hundi at kanna umstøðurnar fyri at vita um tað ber til at fáa greiði á, akkurát, hvat er hent.
Løgreglan er nú í ferð við at geva donsku løgregluni boðini, so at tey kunnu kunna tey avvarðandi í Bretlandi.
