Til at kunna fólk, kanska serliga fremmand ferðafólk, um føroyska sjófuglin, hava Ferðaráð Føroya og Føroya Náttúrugripasavn givið út ein faldara, sum lýsir føroyska sjófuglin. Faldarin er prentaður á trimum málum. Føroyskum, donskum og enskum.
Faldarin, sum er prentaður í litum, sigur eitt sindur frá um sjálvan fuglin, um føðina hann tekur, nøring, tal og veiðuhættir. Eisini verður nortið eitt sindur við, hvørjum hóttanum hann kann koma út fyri.
Síðan verða nøkur ávís fuglasløg vald burtur úr rúgvuni og lýst við myndum og teksti.
Ein fjórðingur av faldaranum er brúktur til at gera kort, har ymsir túrar, sum gerast kunnu til at hyggja at fugli, verða lýstir.
Útgevararnir hava ikki latið ávarðingar og góð ráð ligið eftir, tí mint verður á, hvat skilagott er at gera, tá ein ferðast har, fuglur heldur til og eigur, eins og mint eisini verður á, hvussu ein eigur at bera seg at soleiðis í allari almindiligheit, tá ein ferðast í náttúruni.
Sera áhugaverdur er eisini tann parturin av faldaranum har greitt verður frá, nær fuglurin er í Føroyum og ikki minst, at upplýst verður um, hvussu nógv er til av hesum fugli.
Faldarin um Sjófugl í Føroyum er gjørdur við stuðuli frá Oljumálaráðnum, siga útgevararnir, og ætlanin er eisini at gera fladara av sama slagi um heiðafugl og kanska eisini býfugl í Føroyum.
