Í nýggjastu útgávuni av FSF-tíðindum ber millum annað til at lesa um, at formaðurin í kappingarnevndini hjá FSF, Bjarki Mohr, í áhugaverdari grein, setur spurning við, um próvtilfarið er haldgott, tá ið kappingarnevndin skal taka støðu til innkomin mál og kærur.
Videoupptøkur sum próvtilfar
Bjarki Mohr skýtur í grein síni upp, at støða verður tikin til, um tíðin ikki er búgvin til, at videoupptøkur verða nýttar sum próvtilfar, tá ið kappingarnevndin skal taka støðu til ymisk mál. Formaðurin í kappingarnevndini sigur, at nú vit liva í einari tíð við framkomnari tøkni, verða nærum allar hendingar á leikvøllum festar á sjónband. Tað hevði gjørt tað lættari hjá kappingarnevndini at avgreitt innkomin mál, um hesar kundu nýtast sum próvtilfar, og sum hann eisini sigur, so er tað trupult at burturforklára, tað eyga sær.
Ein onnur áhugaverd grein í FSF-tíðindum er greinin hjá varaskrivaranum í FSF, Fríða B. Nielsen, um at FSF komandi ár ætlar sær at seta nøkur av minstukrøvunum hjá UEFA í verk í 2. deild. Í høvuðsheitinum snúgva hesi minstukrøv seg um, at feløgini skulu lúka nøkur minstukrøv, sum fata um ítróttarlig, starvsfólkalig, bygnaðarlig, løgfrøðilig og fíggjarlig krøv. Hesi eru galdandi í fremstu deildini, og til tess at feløg í 2. deild, sum flyta upp í fremstu deildina, ikki skulu fáa ein skelk av hesum krøvum, ætlar FSF at seta nøkur av teimum í verk í 2. deild komandi ár, so at feløgini hava lættari við brynja seg til fremstu deildina.
