Í gjár kom skriv frá Fótbóltssambandi Føroya um, at aðalfundurin verður í Norðurlandahúsinum leygardagin 19. februar ár 2000, klokkan 10.00 stundisliga.
Skráin er sambært ásetingunum, og FSF sigur í skrivinum, at mál, sum viðvíkja kappingarreglunum fyri fótbólt, skulu sendast sambandinum í seinasta lagið 19. januar. Mál, sum viðvíkja ásetingunum fyri Fótbóltssamband Føroya, skulu vera FSF í hendi í seinasta lagið 5. februar.
Umframt málini, sum nevndin í FSF og feløgini møguliga leggja fyri fundin, verður á skránni ársfrágreiðing, framløga av grannskoðaðum roknskapi, og val av nevndarlimum og grannskoðarum.
Fyri vali til nevndina í FSF standa hesa ferð formaðurin, Torleif Sigurðsson, og nevndarlimirnir Dánjal Andreasen, Jákup Simonsen og Karl Vidtfeldt.
Síðani FSF varð stovnað 13. januar í 1979, hava aðalfundirnir altíð verið í januar. Tað hevur staðið í ásetingunum fyri Fótbóltssambandið. Aðalfundurin í fjør broytti ásetingarnar, soleiðis at aðalfundurin skal vera í januar ella februar, og hesa ferð verður fundurin altso 19. februar.
Undankappingin uppá pláss fyrst
Á aðalfundinum plagar skráin fyri landskappingarnar at verða løgd fram, og lutakastið fyri steypakappingarnar plagar eisini at vera á fundinum. Frá FSF hevur áður verið sagt, at tað fer ikki at bera til at leggja endaligu skránna fyri landskappingarnar og steypakappingarnar í ár 2000, fyrrenn tað er greitt, hvussu skráin fyri HM undankappingina fer at síggja út.
Tann spurningin er ætlanin at avgreiða fríggjadagin 21. januar. Tá fara Allan Simonsen, Jens Erik Magnussen og Ísak Mikladal til Zürich at fundast við umboð fyri hini londini, sum Føroyar eru í HM undankappingarbólki saman við (Jugoslavia, Russland, Sveits, Slovenia og Luksemburg). Oftast plagar tað at ganga skjótt fyri seg at fáa ta skránna upp á pláss, og um tað fer at gangast á sama hátt hesa ferð, so átti møguleiki at veri hjá FSF at lagt skránna fyri steypa? og landskappingarnar fyri feløgini á aðalfundinum.
Í fjør varð fyrsta innleiðandi umfarið í kappingini um løgmanssteypið spælt 14. mars, og tað varð farið undir bólkaumfarið 28. mars. Í fjør fóru kvinnurnar undir steypakappingina 5. apríl. Í fjør varð sjøtul settur á landskappingarnar hjá ávikavíst monnum og kvinnum 25. og 30. apríl.
