FSF fær nýggjar nevndarlimir

Føroysku fótbóltsfeløgini hava fingið fundarboð klokkan 13, men longu klokkan 12 borðreiðir Fót­bólts­sambandið við einum døgurða­bita í FSF-húsinum, ið aftur hesa ferð hýsir aðalfundinum.
Undan hesum, umleið klokkan trý korter til 12, verður tó ein lítil fundur millum formenninar í feløg­unum, ið hevur til endamáls at tryggja, at allir halda fast við upp­runa­ligu semjuna um útskifting í starvs­nevndini.
Formenninir komu tann 31. oktober í 2009 av fyrstan tíð komu ásamt um, at øll starvsnevndin í FSF skuldi skiftast út í kjalarvørrinum av málinum um aðalskrivaran, Ísak Mikladal. Hetta var tað einasta, øll feløgini kundu semjast um á nógv umrødda fundinum á Hotel Hafnia, ið vardi tað nógva av einum leygardegi.
Semjan fekk á aðalfundinum í fjør tær avleiðingar, at Høgni í Stóru­stovu, Rúni Heinesen, Magnus á Stongum og Sveinur Tróndarson fóru úr starvsnevndini, og hesa ferð stendur so restin av »gomlu« nevndar­limunum fyri tørni. Talan er um tríggjar nevndarlimir, ið standa fyri vali.

Tveir stilla uppaftur
Niklas á Líðarenda hevur ikki latið seg stillað uppaftur, men tað hava hinvegin Karl Vidtfeldt og Niclas Davidsen, ið hava fingið heim­staðar­feløg síni, ávikavist B71 og B68, at stilla seg upp.
Hetta er ikki í tráð við semjuna millum feløgini, sum tey mestsum øll eru sinnað at halda, og tí stendur ein stórur meiriluti av feløgunum aftan fyri trý onnur valevni til starvs­nevndina, sum eru Jógvan Páll Joensen, Heðin D. Poulsen og Trygvi Mortensen.
Semjan frá 2009 var aftur á skránni, tá formenninir hittust til fundar fyrst í desember, og enn eina ferð tóku feløgini undir við, at haldast skuldi fast við útskiftingina í starvsnevndini. Hetta skal nú standa sína roynd, men frá væl­vit­andi keldum veit Sosialurin, at fundarboð eru farin út til allar for­menninar um lítla undanfundin fyri miðdag. Á hesum fundi verður semjan enn eina ferð skorin út í papp, so helst øll feløgini kunnu fáast at standa við hana, tá atkvøðast skal. Fyri nógv tey flestu feløgini er hetta ein spurningur um trú­virði, tí bert við at gjøgnumføra útskift­ingina kunnu feløgini halda orð – ikki minst mótvegis teimum, ið noyddust út fyri einum ári síðani, tí treytin var, at øll starvsnevndin skuldi skiftast út.