Tað gongur sum eftir ánni hjá norska Framburðsflokkinum, sum nú rósa sær av at vera størsti flokkur í Noregi.
Ein kanning, sum Bergens Tidende almannakunngjørdi í gjár, vísir, at var val til Stórtingið nú, hevði Framburðsflokkurin fingið 31,8 prosent av atkvøðunum. Tað eru 4,7 prosentstig meiri enn fyri bara einum mánað síðani.
Harafturímóti gongur tað illa hjá tí stóra stjórnarflokkinum. Arbeiðaraflokkurin fær sambært nýggju kanningini 28,7 prosent ímóti góðum 33 prosentum fyri einum mánað síðani. Hinir báðir flokkarnir í stjórnini standa at kalla í stað.
