Eitt brúgvalag við regni og øtlandi vindi av suðri nærkast Føroyum, men leggur seg væntandi beint sunnan fyri Føroyar og verður liggjandi. Mitt í vikuni fer eitt lágtrýst á veg í ein landnyrðing væntandi framvið beint eystan fyri Føroyar og hevur við sær regn og ælaveður av útsynningi. Seinni í vikuni nærkast enn eitt lágtrýst av útsynningi.
Veðrið í dag
Strúkur í vindi upp í skrið av suðri, 13 til 18 m/s, sum seinnapartin minkar niður í stívt andøvsgul upp í hvassan vind, 10 til 15 m/s. Framvegis skýggjað og regn av og á. Í nátt minkar hann vindin í andøvsgul upp í ein strúk í vindi av landsynningi, 8 til 13 m/s. Lutvíst klárt og yvirhøvur turt. Hitin alt samdøgrið millum 4 og 8 stig.
Týsdagin
Andøvsgul upp í ein strúk í vindi av landsynningi, 8 til 13 m/s, sum út á dagin minkar í gul til stívt andøvsgul, 5 til 10 m/s. Samdrigið og ælaveður og hitin millum 6 og 9 stig. Um kvøldið minkar hann vindin í lot til andøvsgul av eystri og landnyrðingi, 2 til 7 m/s. Sum frá líður yvirhøvur turt og lutvíst klárt og hitin millum 2 kuldastig og 5 hitastig.
Mikudagin
Lot til andøvsgul av eystri og landnyrðingi, 2 til 7 m/s, sum minkar í eitt lítið lot av ymsum ættum, undir 5 m/s. Yvirhøvur turt og sólglottar og hitin um 5 stig. Um náttina snarar hann í ein útsynning og verður lot til andøvsgul, 2 til 7 m/s. Yvirhøvur turt og stundum klárt og hitin millum 2 kuldastig og 5 hitastig.
Hósdagin
Lot til andøvsgul av vestri og útsynningi, 2 til 7 m/s. Okkurt æl, men onkrir sólglottar og um náttina lutvíst klárt. Hitin um dagin millum 4 og 7 stig, um náttina millum 2 kuldastig og 5 hitastig.
Fríggjadagin
Lot til andøvsgul av útsynningi, 2 til 7 m/s, sum snarar í ein landsynning og eystan og veksur vindin í gul til stívt andøvsgul, 5 til 10 m/s. Um náttina hækkar hann í landnyrðing og norðan. Ælaveður, men eisini onkrir sólglottar og um náttina lutvíst klárt. Hitin um dagin millum 5 og 8 stig, um náttina millum 2 kuldastig og 5 hitastig.
Leygardagin
Gul til stívt andøvsgul av landnyrðing og norðri, 2 til 7 m/s, sum snarar í ein útnyrðing og veskur vindin í gul til stívt andøvsgul, 5 til 10 m/s. Ælaveður, men eisini onkrir sólglottar og um náttina lutvíst klárt. Hitin um dagin millum 4 og 7 stig, um náttina millum frostmarkið og 6 hitastig.
