Tað gongur strúkandi hjá Jón Róa Jacobsen og Frem. Leygardagin høvdu teir vitjan av Næstved, sum í summar flutti upp í næstbestu deildina. Uppflytararnir megnaði púrt einki at gera við Frem, sum í summar flutti niður úr superliguni. Úrslitið var glæsiligur 6-1 sigur, eftir at tað í steðginum hevði staðið 2-1. Jón Rói Jacobsen var allar 90 minuttirnar í Frem miðverjuni. Hesa ferð var hann tó ikki millum málskjúttarnar. Gunnar Nielsen var aftur hesa ferð eykamálverji hjá Frem.
Sigurin bar við sær, at Frem er næstfremst. Teir hava 24 stig og eru tvey stig aftanfyri oddaliðið. Á odda eru Johan Byrial Hansen og Horsens. Hesa ferð høvdu teir vitjan av niðurflytarunum úr AB, sum vórðu sendir aftur til Keypmannahavnar við 2-0 tapi.
Hjá Fremad Amager gekk ikki so væl. Teir vóru á útivølli móti SønderjyskE, og teir taptu 3-2. Sigursmálið fekk heimaliðið, tá ið tað restaðu tríggir minuttir.
Andrew av Fløtum var einasti føroyingurin, sum átti lut í Fremad Amager avrikinum. Hann varð settur inn í álopið, tá ið tað restaðu átjan minuttir, og støðan var 2-1 til heimaliðið. Níggju minuttir eftir at Andrew var komin á vøllin javnaði Fremad Amager, sum hevði ligið undir 2-0. So varð ein Fremad Amager rikin av vøllinum, og heimaliðið fekk sigursmálið.
Hjalgrím Elttør var við í Fremad Amager hópinum, men hann slapp ikki framat á vøllinum. Fremad Amager hevur 21 stig og er á fimta plássinum saman við Vejle. Sunnudagin var Vejle í Fredericia, har teir vunnu sannførandi 3-0. SønderjyskE er nú nummar trý, og HIK er á fjórða plássinum.
