Gundadalur er nú partur av fjarhitaskipanina hjá Fjarhitafelagnum, eftir at John Zachariassen, nevndarformaður í SEV og Jákup Dam, býráðslimur í Tórshavnar kommunu, umboðandi eigararnar, skrúvaðu ventilarnar til Gundadal frá seinnapartin í dag.
- Henda útbyggingin av fjarhitaleiðingini hevur við sær, at fleiri stórir bygningar í næstum verða bundnir í skipanina. Talan er um nýggja bygningin hjá Bank Nordik, Stórhøllina á Hálsi og FSF-bygningin. Seinni í vár verður svimjihylurin í Gundadali eisini knýttur í skipanina, og harumframt er klárt á knýta Tórsvøll uppí.
Tað veit Fjarhitafelagið at siga, og lagt verður aftrat, at útbyggingin skumpar Tórshavnar kommunu nógv nærri sínum egna máli um, at CO2-útlátið í høvuðsstaðnum skal minka 20 prosent í 2022 sammett við 2013, tá Tórshavnar kommuna setti sær hetta málið.
- Framvegis er nógv tøk orka, sum kann leiðast inn í fjarhitaskipanina, og tí verður fjarhitanetið áhaldandi bygt út, so avlopsorkan frá Sundsverkinum og Brennistøðini á Hjalla verður gagnnýtt so væl sum til ber, sigur Sune Jacobsen, nevndarformaður í Fjarhitafelagnum.
Hann vísir á, at Fjarhitafelagið er ein týðandi orkuberi í landsins størstu kommunu, og at ætlanin er at fáa bæði vindorku og sjóarhita inn á fjarhitanetið komandi árini.
Fjarhitafelagið og eigararnir – SEV og Tórshavnar kommuna – halda fram við fjarhitaleiðingini oman eftir Hoydalsvegnum og oman til Finsen, sum verður bundið í fjarhitaskipanina í ár. Aðrir bygninginar í miðbýnum verða eisini knýttir í, har fjarhitin kemur fram við.
Talið av fjarhitabrúkarum hevur verið støðugt vaksandi seinnu árini. Fyri 10 árum síðani vóru stívliga 700 brúkarar í skipanini, og í dag eru 1100 brúkarar knýttir í fjarhitanetið.
