Tað er møguleiki fyri, at føroyski landsliðsmálverjin, Gunnar Nielsen, má leita sær eftir einum nýggjum felagi, nú sáttmálin við íslendska FH gongur út síðst í hesum árinum. Íslendska fotbolti.net veit at siga, at FH fer at fremja stórar útskiftingar í hópinum, og at Gunnar Nielsen helst er ein av leikarunum, sum ikki sleppur at halda fram.
Sambært fotbolti.net, so er FH áhugað í bosniska málverjanum, Kristijan Jajalo, sum í løtuni er liðfelagi hjá René Shaki Joensen í Grindavík. Kristijan Jajalo er 25 ára gamal og hevur staðið stinnur í myndini í Grindavík í ár, meðan kappingarárið hjá 31 ára gamla Gunnari Nielsen – eins og hjá FH – hevur verið upp og niður.
FH hevur verið nevndur sum løntyngsti hópurin í Íslandi, og vegna eitt vónbrot av einum kappingarári, har FH í løtuni er nummar fimm, er ein størri upprudding á veg í hópinum. Í løtuni eru 10 útledningar á lønarlistnaum, og sambært fotbolti.net, so er framtíðin hjá útlendingunum í hópinum óviss.
Les eisini: Íslendskur áhugi fyri Brynjari
Tríggir føroyingar spæla við FH. Teir eru, umframt Gunnar Nielsen, eisini Jákup Thomsen og Brandur Hendriksson. Jákup Thomsen, sum nýliga hevur fingið gongd í málskjótingina, er leigaður úr danska FC Midtjylland, meðan Brandur Hendriksson, ið hevur verið ein av frægastu monnunum hjá FH í ár, hevur sáttmála í eitt ár afturat.
Gunnar Nielsen kom til FH fyrst í 2016 eftir at hann hevði spælt hálvtannað ár við kappingarneytunum í Stjørnuni. Frammanundan tað hevur uttanlandsævintýrið hjá HB-uppalda málverjanum leitt hann til BK Frem, Blackburn, Manchester City, Wrexham, Tranmare, Silkeborg og Motherwell.
