Tá var spurningurin viðgjørdur politiskt um at innføra ókeypis busskoyring, sum lið í strembanini eftir at økja um nýtsluna av bussunum, og samstundis at flyta nakað av privatu bilferðsluni yvir á kollektivu ferðsluna.
Eisini ynskti man m.a. at ala børnini til á ein náttúrligan hátt at brúka bussarnar, heldur enn at verða koyrd til og frá skúla, ítrótti, frítíðarvirksemi o. ø.
Eitt annað týdningarmikið sjónarmið var, at færri tal av bilum fast í býnum um dagarnar, hevði somuleiðis bøtt um parkeringsmøguleikarnar.
Danski stovnurin Teknologirådet hevur eisini viðgjørt spurningin um ókeypis býarbussar í drúgvu frágreiðingini “Gratis offentlig transport”, har sagt verður m.a.:
“Tað er breið semja ímillum sakkøn um, at samfelagsbúskaparligir fyrimunir eru at heinta við at flyta privatbilismu yvir á almenna ferðslu. Hildið veður, at samfelagið í síni heild vil vinna við at gera almennu ferðsluna ókeypis. Ikki við beinleiðis avlopi, men útfrá eini heildarætlan og eini langtíðar samfelagsbúskaparligari meting, har tann vantandi ferðaseðlainntøkan kann verða vigað upp við færri útreiðslum á øðrum økjum.”
Og hesi seinnu árini hava vit jú øll somul hoyrt ferð eftir ferð, og frá øllum møguligum serfrøðingum, sagt frá um, hvussu týdningarmikið tað er, at vit leggja á annan bógv, tá tað ræður um at skerja CO2-útlátið og at minka um veðurlagsárinið frá eitt nú verandi ferðslumynstri.
Nógv vatn er runnið í áunum síðani 2006, og vit hava gjørt okkara royndir. M.a. hava vit eisini tikið næsta stigið at økja um títtleikan í busskipanini; úr tvær ferðir um tíman til tríggjar ferðir um tíman á høvuðsleiðunum.
Eisini hevur fyritøkan Lóður gjørt umfatandi kanning av bussleiðini, ikki bara við teljingum, men við spurnarkanningum millum allar borgarar í kommununi – eisini teimum sum ikki brúka Bussleiðina.
Kanningin sigur m.a. at, samlaða ferðafólkatalið er hækkað, síðani teljingarnar í mai 2006. Royndirnar vísa, at við fleiri leiðum, verður ferðafólkatalið nógv økt, tí tænastan sum heild verður betrað.
At tey, sum vinna minst pening, koyra mest buss, undrar kanska ikki so nógv. Men í kanningini er eisini áhugavert at síggja, hvussu javnt tað er millum teir næstu tveir inntøkubólkarnar. Her síggjast tí týðiligir vakstrarmøguleikar fyri alt samfelagið.
Kanningin hjá Lóður vísir somuleiðis á, at eitt átak, ið hevði til endamáls at upplýsa fólki, hvussu ”dýrt” tað er at brúka bilin, kundi broytt hugburðin mótvegis bussleiðini.
Áhugavert er at síggja, hvussu bussleiðin hjá Tórshavnar kommunu hevur fingið afturljóð, bæði úti í heimi og í millum kommunur runt landið. Kann nevna, at Eysturkommuna hevur sett líknandi skipan í verk, Sørvágs kommunu hevur viðgjørt spurningin, og í hesum døgum lesa vit um, at málið er reist í Klaskvíkar býráði. Fjølmiðlar og politikarar úr eitt nú Noregi og Sveis hava víst stóran áhuga fyri skipanini í Tórshavnar kommunu um ókeypis busskoyring.
Jú, tað er hugaligt at vera slóðari og at vísa í verki, at hetta er ein gongd leið.
Við framkomnari tøkni fara bussarnir at hava eina GPS-skipan, soleiðis at tú altíð kann fáa at vita, hvar bussur tín er staddur á leiðini, antin við SMS ella yvir netið. Somuleiðis fara bussarnir eisini at hava tráðleyst internet. Og ein sjálvvirkandi ferðafólkateljuskipan, ið skrásetir hvørja fer onkur fer út úr bussinum og onkur kemur inn í bussin, fer at hava alstóran týdning fyri at fáa eina enn betri bussleið, sum tænir fólkinum best. Skipanin fer at virka við til, at møguleikin at gera tey røttu inntrivini er til staðar og fer at økja um nyttuvirðið á bussleiðini.
Eisini hevur tekniska nevnd samtykt, fyri at styrkja um tann norðurlendska samleikan, at bussarnir fara at flagga við norðurlendskum fløggum á teirra tjóðardøgum. Soleiðis fara bussarnir t.d. at koyra við norskum fløggum 17. mai, Dannebrog 5. juni, íslendskum fløggum 17. juni, finskum fløggum 6. desember o.s.fr.
Hesir 14 spildurnýggju bussarnir eru øðrvísi enn aðrir, vit eru von við, og ein maður segði við meg ein dagin, at teir eru misháttaðir, men lat tað fara. Nei, her er tað ikki útsjóndin, sum er tað avgerandi, men heldur hugsjónin og viljin til at hava bussar sum lúka umhvørviskrøv og eru betri egnaðir til okkara heimligu vegir. Bussarnir eru 2,5 m styttri enn teir gomlu, men taka tó eins nógv ferðafólk. Teir hava hægstu umhvørvisgóðkenning, brúka helvtina minni av brennievni, og eru nógv lættari. At takið fylgir dúrkinum, er ein av smálutunum fyri at fáa bussin lættari og harvið meira umhvørvisvinarligan.
Eg vil takka teimum sum hava, røkt bussambandini í kommununi tey síðstu nógvu árini; Mouritsens bussar, ið hava røkt høvuðsleiðirnar í Havn, Gundurs bussar til Kollafjarðar og Kaldbaks, og Hildur Jensdóttir til Velbastaðar og Kirkjubøar. Fari eisini at ynskja tykkum til lukku sum vunnu útboðið av Bussleiðini á hesum sinni; høvuðsarbeiðstakarin Gundur Johannesson, og undirarbeiðstakararnir Jón Thomasen og Heðin Zacahariasen. Eg ivist onga løtu í, at teir fara at taka hesa uppgávu í størsta álvarsemi, og fara at røkja Bussleiðina fyrimyndarliga. Tað haldi eg, teir longu hava prógvað í ávísan mun.
Fari eisini at veita eina stóra tøkk til teknisku umsitingina hjá kommununi, sum hava lagt lív og sál í hetta arbeiðið. Hetta hevur ikki verið lætt hjá teimum at totast við. Eitt eru politisku rembingarnar, ið tey hava skula fyri haldið seg til, men tað, at fáa eina ferðaætlan at hanga saman, er so sanniliga eitt putlispæl við lít. Ynskini eru nógv; borgarafundir hava verið hildnir, skúlaleiðslur, dagstovnar, staðbundnar nevndir, borgarar o.o. hava verið inni á vøllinum. Tey hava alla tíðina við beinasemi roynt at loyst øll ynskir. Hóast tað fíggjarliga loftið frammanundan var lagt politiskt haldi eg, at vit hava eitt úrslit, sum tænir fjøldini frægast. Men Bussleiðin er ongantíð liðug, og fara vit alla tíðina at stremba eftir, við tillagingum og útbygging, at gera hana enn betri. Við nýggju tøknini kunnu vit við neyvum og próvføstum tølum fáa tað bestu ferðaætlanina.
Eisini fari eg at ynskja øllum borgarum í Tórshavnar kommunu til lukku við hesum nýbroti. Nú er grundvøllurin lagdur fyri eina framtíðar bussleið á dagførdum tøkniligum støði.
