Tíbetur viðurkenna flestu fótbóltsspælarar hvussu týdningarmikið tað er at hava góðar fjepparar, og er hetta eisini galdandi hjá Ipswich.
Tá Ipswich og Norwich spældu hálvfinalu til Play Off-finaluna, har triði uppflytarin skal finnast til Premier League stóð á gomlum nøglum hjá Ipswich á heimavølli á Portman Road leikvøllinum. Tá so Paul Andersson loksins javnaði fyri Ipswich, og tryggjaði teimum javnleik 1-1, var fagnaðurin so stórur heima hjá stóra Ipswich-fjepparanum, Ross Morgan, at hann leyp upp og langaði nevan uppundir loftið. Skjótt sá Ross Morgan, at loftið hevði fingið skaða.
Ross Morgan koyrdi út á Twitter beinavegin : - Eg leyp upp og langaði eitt hol á loftið hjá mær, tá vit skoraðu. Men leggi eg nakað í tað? Nei slettis ikki.
Tað gekk ikki lang tíð, so fekk Ross Morgan eini Twitter-boð frá Paul Andersson, sum skrivaði : - Sig mær hvussu nógv skaðin kostar, so skal eg rinda tað. Tað er jú mín skuld, at tú fekk hendan skaðan á loftið.
Í samrøðu við BBC sigur Ross Morgan, at hann er púra ovfarin, at Paul Andersson vil rinda fyri skaðan. - Hetta er fantastiskt. Eg var ikki so glaður, tá Norwich legði seg á odda, men tá "Ando" javnaði fyri Ipswich klikkaði tað fyri mær. Eg hoppaði og dansaði við knýttum neva, og áðrenn eg visti av var nevin farin ígjøgnum loftið.
Á myndini sæst Ipswich-fjepparin reypa um minniliga skaðan hjá sær.
Nakrir Ipswich-fjepparar eru í Føroyum, og hvat vit vita um, so eru Ipswich-fjepparar bæði í Fuglafirði, í Vestmanna og í Havn, og helst aðrastaðni í Føroyum eisini.
Seinna hálvfinalan millum Norwich og Ipswich verður spæld komandi leygardag. Norwich hevur heimavøll hendan dystin. Dystirnir millum Ipswich og Norwich ganga eisini undir navninum "The East Anglia Derby".
