(Sochaux, Frakland): Eftir øllum at døma verður tað blást til álop frá fyrsta briksli, tá føroyska landsliðið fer i franska eldin í kvøld.
Tað stendur í øllum førum fast, um hugt verður at uppstillingini, sum fraklendingar væntandi tveita á vøllin í kvøld. Á pappírinum er talan um 4-4-2, men í nógvar mátar tykist talan heldur vera um 4-2-4, har stórt trýst skal leggjast a føroyska liðið langt frammi á vøllinum.
Blaðið, le Republikan, roknar við, at uppstillingin hjá Fraklandi verður hendan: Mickael Leandreau - Willy Sagnol, Lilian Thuram, Jean Alain Boumsong, Julian Escudé - Franck Ribery, Claude Makelele, Patrick Vieira, Florent Malouda - Thierry Henry, Louis Saha.
Talan er um eitt stjørnusett franskt landslið, sum telist millum tey sterkastu í heiminum.
Venjarin ávarar
Franski landsliðsvenjarin ávarar sínar spælarar ímóti at kenna seg ov tryggar í at vinna sínar dystir.
- Eg ávaraði spælararnar undan dystinum ímóti Skotlandi, og tað geri eg eisini áðrenn dystin ímóti Føroyum, segði Raymond Domenech á tíðindafundi í gjár.
- Hetta verður einn trupul bólkur. Skotland gav okkum stórar trupulleikar, og nú skulu vit kappast við teir um fremsta plássið í bólkinum, segði Domenech.
