Ein skipasmiðja í Sevastopol á Krim er rakt av rakettum, og í minsta lagi 24 fólk hava fingið løstir.
Tað siga myndugleikarnir, sum russar hava sett á Krim, á boðtænastuni Telegram.
Á sosialum miðlum síggjast video-brot og myndir av spreingingum og eldi á skipasmiðjuni.
Guvernørurin í Sevastopol, Mikhail Razvozjajev, skrivar á Telegram, at rakettálopið byrjaði tíðliga í nátt okkara tíð.
Tað var eisini guvernørurin, sum upplýsti, at 24 fólk vóru løstað í álopunum á skipasmiðjuna.
- Øll neyðhjálparfólk arbeiða á staðnum, og eingin vandi er fyri sivilum bygningum í býnum, skrivar guvernørurin.
Sevastopol er størsti býur á Krim-hálvoynni, sum russar tóku frá Ukraina í 2014.
Russland hevur brúkt Sevastopol sum miðstøð fyri svartahavsflotanum.
Skipasmiðjan, sum varð rakt í nátt, verður brúkt til umvælingar av bæði skipum og kavbátum, sum Russland brúkar í krígnum móti Ukraina.
Ógreiða ræður um, hvussu umfatandi álopini á Krim í nátt eru, og upplýsingarnir um støðuna eru ikki váttaðir av óheftum keldum.
- Ukraina hevur ikki gjørt viðmerkingar til álopið á Krim í nátt, veit tíðindastovan NTB at siga í morgun.
