Tað var ætlanin, at seinastu fólkini skuldu fara út úr barakkini við Landssjúkrahúsið tann. 8. desembur 2008, men í gjár vóru øll fólkini enn á deildini og har verða tey eisini í eina tíð framyvir.
- Mann hevur ikki møguleika at lata deildina aftur, so hon kemur at koyra í eina tíð afturat, sigur Allan Skaalum, sjúkrahússtjóri. Hann leggur afturat, at talan er um sjúklingar, sum í veruleikanum eru útskrivaðir, men, at orsøkin til, at teir eru verandi, er, at pláss ikki er fyri teimum aðrastaðni.
- Ætlanin var at finna eina loysn saman við Nærverkinum, men tað er eisini trýst á teirra skipan, so fólkini vera verandi í eina tíð afturat, greiðir Allan Skaalum frá. Hann greiðir eisini frá, at tey royna at hava deildina opna, soleiðis, at tey ikki hava fólk á gongum.
Ikki nøktandi
Tað, sum sambært Allani Skaalum er størsti trupulleikin, er, at hesi fólkini, sum í veruleikanum eru frískt, brúka miðlar hjá Landssjúkrahúsinum og tí á ein hátt forða øðrum sjúklingum at koma framat.
- Talan er um tíggju fólk á E2. Hesi upptaka í veruleikanum sengur, ið kundi verið nýttar til veruliga sjúklingar, men vit fáa ikki sett tey á dyr, tí onkustaðni skulu tey vera, sigur Allan Skaalum, sum heldur tað vera ein trupulleika, at sjúkrahúsið ikki kann fokusera heilt upp á sjúkar sjúklingar. Hann harmast eisini, at ongi verulig boð kunnu gevast arbeiðsfólki og búfólki.
Eygnadeildin
Ætlanin er at ríva barakkina niður og at byggja annan bygning í staðin, men tað er ikki nakað, sjúkrahússtjórin sær fyri sær í nærmastu framtíð.
- Eygnadeildin verður verandi har í nøkur ár afturat. Vit mugu í hvussu so er hava hana verandi har, til møguleiki er fyri einari permanentari loysn í øðrum bygningi, sigur sjúkrahússtjórin.
Barakkin var tikin í nýtslu fyrst í trýssunum, og skuldi vera ein fyribilsloysn. Ætlanir hava verið frammi, um at gera sjúklingahotell, har barakkin stendur, men eftir øllum brøgdum verður tað ikki enn.
