Í blaðnum í gjár kom fram, at Johan Dahl, landsstýrismaður, hevur gjørt av, at hann ikki fer at leggja ætlaða broytingaruppskotið í rúsdrekkalógini fram um, at taka burtur avmarkingarnar fyri sterkum øli í Føroyum í dag. Gurndgevingin hjá var, at hann vil ikki seta samgonguna í váða.
Í blaðnum í dag hava vit eina spurnarkanningin millum tingfólk, sum vísir, at ein meiriluti av tingfólkunum eru fyri hesi broyting.
Samstundis hava vit eina Gallup kanning, sum vísir, at heili 62 prosent av Føroya fólki ynskja, at í øllum førum øl og vín skal kunna seljast í handlunum.
Nú kenna vit øll tilgongdina í rúsdrekkasølumálinum í Føroyum. Valla hevði annað borið til í 1992, enn ta skipan, vit fingu tá við Rúsdrekkasølu Landsins.
Men spurningurin er, um tíðin ikki er farin frá hesi skipan. Allar tær avmarkingar, sum tað almenna ásetir, kunnu varðveitast, hóast sølan fer fram í handlum kring landið. Hetta kann eisini gerast eitt kærkomið búskaparligt ískoyti hjá handlum kring landið.
Rúsdrekkasølan brúkar nógvar pengar til leigu av hølum, til umsiting og til lønarútreiðslur. Um handilin varð fluttur út í handlarnar, so kundi tað almenna spart nógvar pengar.
Ein atfinning verður sjálvandi, at betri atkomiligheit kann økja um samlaðu nýtsluna. Men landsstýrið hevur longu stungið út í kortið, at rúsdrekkasølan skal økjast, tí í fíggjarlógaruppskotinum fyri 2010 er roknað við hægri umsetningi og størri avlopi hjá Rúsdrekkasølu Landsins.
Tað er sjálvandi einki endamál at økja rúsdrekkanýtsluna – og tað skal ein liberalisering sjálvandi heldur ikki bera í sær. Men tað hevur týdning, at vit fáa eitt sømuligt kjak um málið – grundað á sakliga argumentatión.
