Tað stóðst rættiligt rumbul av tá tað kom fram, at landsverksfrøðingsstovnurin, eftir ætlan landsstýrismansins skuldi leggjast saman við strandferðsluni. Landsverksfrøðingurin, Henning Jacobsen, varð sagdur úr starvi og Reidar Nónfjall settur sum stjóri á samanlagda stovninum. Ella varð hann tað.
Starvsfólki setti seg upp í móti avgerðini um samanlegging og í móti avgerðini at siga landsverkfrøðinginum upp. Politikkur kom í málið uttan at stórvegis hendi. Í tinginum vóru royndir gjørdar at loysa málið, men alt rann meiri og minni út í sandin, so at siga.
Tey trý fakfeløgini, Starvsmannafelagið, Føroya Verkfrøðingafelag og Føroya Byggifrøðingafelag gjørdu beinanvegin vart við sína ónøgd, og kravdu eina rætta og regluliga loysn, og sambært teirra metingum, so var nógv, sum bendi á, at løgmaður, sum jú situr við ovastu ábyrgd í samgonguni, eisini vildu tað.
Hetta, siga tey trý fakfeløgini, er nú eisini farið fyri bakka.
Finnur Helmsdal var ikki nøgdu við svarið, sum løgmaður gav honum uppá fyrispurningin um handfaringina av málinum, og tí er málið nú lagt fyri landsstýrismálanevndina.
Tað er í hesum sambandi, at tey trý fakfeløgini hava gjørt frágreiðing í málinum.
Í tíðindaskrivi siga tey, at eisini tey eru ónøgd við svar løgmans og at frágreiðingin frá teimum tí skal metast sum ein stuðul undir kæruni til landsstýrismálanevndina.
Hetta verður nú ikki einasta tilfar, sum verður til taks fyri myndugleikarnar undir viðgerðini av landsverkfrøðingsstovninum.
Í sambandi við ósemjuna, sum tók seg upp undir viðgerðini av stovninum varð gjørd semja millum starvsfólk stovnsins og løgmann, sum segði, at ongar broytingar verða framdar á stovninum uttan starvfólkini og fakfeløg teirra eru tikin upp á ráð.
Uppleggið frá fakfeløgunum er nú komið, og hósdagin í næstu viku, kemur stovnslýsingin frá starvsfólkunum.
