Í annaðkvøld, fríggjakvøldið, klokkan 19, verður almennur fundur á Norðurbryggjuni í Keypmannahavn um fráflytingina úr Føroyum.
Talan verður bæði um framløgur, pallborð og orðaskifti.
Fyrireikararnir staðfesta, at fólkafráflytingin er ein tann størsta avbjóðingin, Føroyar hava.
Í hesum sambandi er tað, at Meginfelag Føroyskra Studenta, Sendistova Føroya í Keypmannahavn og Heri á Rógvi og Høgni Reistrup, ritstjórar á bókini EXIT Føroyar, skipa fyri fundinum á Norðurbryggjuni í annaðkvøld um fólkafráflytingina og vantandi tilflytingina.
Á fundinum fer Erika Hayfield í Vinnumálaráðnum at tosa um stóru avbjóðingina við fólkaminking.
Erika er forkvinna í arbeiðsbólkinum, ið landsstýrið hevur sett at finna útav, hvussu vit kunnu venda gongdini og tískil fer hon at greiða frá um arbeiðið í arbeiðsbólkinum og hvørji viðurskifti bólkurin leggur herðslu á.
Heri á Rógvi, búskaparfrøðingur greiðir frá, hvør tann búskaparliga avbjóðingin er, og hví Føroyar í løtuni tapa kappingina, og hvat vit kunnu gera fyri at vinna tað mista aftur.
Heini í Skorini, stjórnmálafrøðingur og Ph.D.-lesandi, varpar ljós á fólkasamansetingina í Føroyum. Ein avleiðing av fráflytingini er nevniliga, at Føroyar eldast við rúkandi ferð, og at ættarliðið millum 18 og 30 er undirumboðað.
Og at enda fer Sigmundur Ísfeld, sendimaður Føroya í Keypmannahavn, at tosa um, at skal tað eydnast at fáa fólk at búsetast í Føroyum, mugu vit vera kappingarfør við onnur lond.
