Handilslív
Jan Müller
Jan@sosialurin.fo
Hølini hava staðið so gott sum óbrúkt í meira enn 30 ár. Tá Conrad Skaale doyði 1974 endaði eisini eitt kapittul í føroyskari bakarísøgu. Nú er so aftur lív í á hesum sera eyðsýnliga og kenda gøtuhorninum. Ergo og Hjálpartól, sum keyptu ognina og hava umvælt hana til endamálið, hevði móttøku í nýggju og rúmligu hølunum fríggjadagin. Í tíðindakrivi siga nýggju eigararnir, sum hava varðveitt gamla ovnin, at ístaðin fyri at elta breyð har verða nú vøddar mýktir í tí framkomna "Relax rúminum ", har fýra av heimsins mest framkomnu massagustólum finnast. Umframt handil húsast har viðgerðarstova við ergoterapi, sansarúm og relaxrúmi. Á 1. hædd er fundar- og undirvísingarhøli. Fimm fólk fara at starvast hjá Ergo og Hjálpartól. Stjóri er Beinta Lassen, ergoterapeutur.
