Tað verður ein sannur víkingadagur við tónleiki, vatnshowi og ymiskum kappingum í Gøtu í morgin, leygardagin, 25. juni.
Víkingadagar hava avloyst gomlu gøtustevnuna, og tí ganga víkingadagarnir upp á skift millum Leirvík og Gøtu, og í ár verður dagurin hildin í Norðragøtu - og tað verður serliga á oyruni, at hildið verður til.
Dagurin byrjar tó á fótbóltsvøllinum, tí klokkan 10 leygarmorgunin verður felagsvenjing fyri allar teir ungu spælararnar í Víkingi. Børnini sleppa eisini at royna ponyríðing, hoppiborgir, fiskikapping og annað leygardagin, og matsølur verða sjálvandi eisini allan dagin.
Eitt heldur øðrvísi tiltak verður eitt sokallað vatnshow, sum verður í bátahylinum. Fólk kunnu tekna seg til kappingina, har tað snýr seg um at halda seg standandi sum longst á einum flaka á sjónum, og harvið vinna ein flogferðaseðil.
Kappingin verður skipað soleiðis, at nøkur fólk í senn tað verða fleiri umfør, um áhugin er stórur verða sett á
ein flaka. Síðani kunnu áskoðararnir spula vatn á tey á flakanum, og loyvt er eisini at tveita vatnbumbur fyri at fáa luttakararnar á bláman. Tann, sum klárar at halda seg longst á flakanum, hevur vunnið kappingina, sum byrjar leygarkvøldið klokkan 19.
Mitt á degnum verður gokart-kapping fyri fyritøkur, og vinnarin vinnur bowling og mat.
Landskappingardystur í fótbólti verður eisini í Gøtu leygardagin. Klokkan 17 fara Víkingur og KÍ at spæla, og tað verður eitt av tiltøkunum, har tað snýr seg um annað enn at hava tað stuttligt. Trý stig í vodafondeildini standa upp á spæl.
Seint leygarkvøldið verður bál tendrað, og tá verður felagssangur, føroyskur dansur, og røða verður hildin. Tað verður løgtingsmaðurin, Torbjørn Jacobsen, sum fer at halda røðu klokkan 23.
Leygarkvøldið ber eisini til at hitta kommunustýrislimirnar, sum fara at arbeiða í barrini í tjaldinum. Har verður høvi at siga sína hjartans meining við tey, sum stýra samanløgdu kommununi.
Víkingadagurin verður rundaður av við dansi í tjaldinum, sum er sett upp til høvið. Har fara Eyðun & Terji at undirhalda frá á midnátt og út á náttina.
