Á Fiskavirkinum í Gøtu eru tey farin í holt við eitt forvitnisligt tiltak, sum kann koma at skapa størri áhuga fyri føroyskum matvørum, bæði úr fiski, seyði, fugli og úr tí, sum bøur og hagi kunnu geva. Á marknaðinum hevur eisini verið eitt útboð av føroyskum klædnapløggum og list.
Hvønn leygardag frá klokkan 11 til 14 skipa tey á Fiskavirkinum nevniliga fyri matmarknað í kantinuni, har fólk, sum hava føroyskar matvørur at selja, kunnu biðja um at fáa ein bás. Í fyrstu syfti hevur verið hugsað um fólk og fyritøkur, sum starvast í nærumhvørvinum.
Páll Gregersen, stjóri á Fiskavirkinum, hevur leingi hugsað um at skipa ein slíkan marknað, har fólk, sum hava føroyskar vøru at selja, kunnu samansjóðast og soleiðis eisini fáa eitt umhvørvi at bjóða sínar vørur fram í. Við átakinum vilja tey í Gøtu varpa ljós á føroyskar matvørur.
- Vit vilja skapa ein marknað, har garðar og framleiðarar av føroyskum rávørum annars kunnu bjóða sínar vørur fram, og har framleiðarar og keyparar eisini fáa høvi at hittast. Tiltakið hevur higartil verið væl vitjað, og vit eru ovfarin av undirtøkuni.
Tað sigur Andras Jákupsson, sum tekur sær av hesum átaki fyri Fiskavirkið í Gøtu. Longu fyrsta leygardagin var nógv fólk inni á gólvinum, og tað vóru mong, sum keyptu sær døgurðamat og ymiskan viðskera, og tiltakið hevur higartil verið væl vitjað hvørja ferð.
- Vit hava eisini havt eitt úrval av okkara egnu saltfiskavørum við á marknaðinum, eins og vit eitt nú hava havt fesk toskarhøvd og feskar lippur, umframt góðan greipingarfisk.
Andras Jákupsson sigur, at pláss er fyri eini sjey básum ella borðum inni í kantinuni. Meðan marknaðurin er, eru eisini eini 40 sitipláss inni í kantununi, har fólk kunnu seta seg niður. Hin fyrsta leygardagin var bilurin hjá Sjógæta her og seldi fisk og kips í túninum, sum fólk kundu keypa og eta inni í kantinuni.
- Vit hava eisini havt aðrar útbjóðarar í túninum, ið hava selt ymiskt, sum fólk, ið vitja marknaðinum, kunnu sita inni í kantinuni og eta, sigur hann.
Andras Jákupsson hevur fingið góða hjálp frá øðrum á virkinum at skipa og skipa fyri marknaðinum. Hann byrjaði at arbeiða á Fiskavirkinum í august í ár, men havi arbeitt her áður í eini fimm ár. Í sínari tíð gekk hann á Fiskivinnuskúla í Vestmanna, har hann gjørdist liðugur í 2009.
- Síðan arbeiddi eg á Fiskavirkinum í Gøtu árini 2009 til 2014, harav av eg var virkisleiðari seinastu tíðina. Seinni havi eg verið í Danmark og lisið økonomi og IT við marknaðarføring sum sergrein. Tað er deiligt at vera aftur á Fiskavirkinum í Gøtu, sigur Andras Jákupsson.
