Nú verður forskúlalíknandi tilboð á Velbastað. Tilboðið verður skipað í samstarvi millum Velbastaðar skúla og Dagstovnin á Velbastað.
Hetta skrivar Tórshavnar kommuna á torshavn.fo.
Endamálið við forskúlalíknandi tilboðnum er, at børnini læra skúla og starvsfólk at kenna og at gera skiftið millum dagstovn og skúla lættari. Tímarnir í forskúlalíknandi tilboðnum verða lagdir til rættis í samstarvi millum dagstovn, skúla og foreldur. Forskúlalíknandi tilboðið verður eisini partur av innskúlingini, yngsta bólki í skúlanum.
Í tilboðnum verður dentur lagdur á eina spælandi tilgongd til tøl, mongdir, bókstavir og ljóð. Tilboðið verður skipað við støði í kunngerðini um skipan og læring í forskúla, og virksemið verður lagt soleiðis til rættis, at tað fevnir um hesi høvuðsøki:
- Samveru og samstarv
- Mál og málmenning
- Rørslu og motorikk
- Sosialar førleikar
- Undran, forvitni og skapanargleði
- Handaverk og list
- Støddfrøði og náttúru og at nýta náttúruna í læringini
Børnini møta i skúlanum um morgunin og eru har í tveir tímar. Børnini fara so í dagstovnin, tá tey eru liðug í forskúlalíknandi tilboðnum, skrivar torshavn.fo millum annað.
