Nú er endaliga staðfest, at demokraturin Barack Obama heldur fram sum amerikanskur forseti og kann sostatt framvegis kalla seg tann 44. amerikanski forsetin.
Valsigurin bleiv staðfestur, tá myndugleikarnir í statinum Ohio kunngjørdu, at Obama hevði vunnið har, tí við hesum sigrinum hevði hann tryggjað sær meiri enn teir 270 valmenninar, sum eru neyðugir fyri at vinna.
-Hetta hava vit framt í felag, og tað er tykkum fyri at takka. Takk øll somul. Fýra ár afturat, skrivaði tann júst afturvaldi forsetin á sín Twitter-profil saman við einari mynd av sær og konuni, Michelle Obama.
