Umframt gamla virkið, so hava tey bygt út – og ætla at byggja enn størri frystigoymslu, fyri at kunna økja framleiðsluna.
Alt hetta hevur verið almannakunnugt leingi.
Myndugleikar á staðnum vita tað sjálvandi, tað hevur verið nógv frammi í miðlunum – og boðskaðurin átti eisini at verið koman niðan á Hoyvíksgarð, har landsantikvarurin húsast við sínum teknum.
Men tann stóri spurningurin er, hví ein kæra frá einum tilvildarligum kverulanti í Havn skal vekja fornfrøðingarnar í Hoyvík? Landsantikvarurin – stjórin á Søvnum Landsins, sum tað nú eitur – hevur átalurætt viðvíkjandi friðaðum bygningum. Tað er tí hansara uppgáva at tryggja, at einki verður gjørt til dømis á Tvøroyri, sum setir friðaðu bygningarnar hjá T. F Thomas Thomsen A/S í vanda.
Men hann skal ikki gera tað, tí at onkur av tilvild hevur kært. Hetta átti hann beinanvegin at gjørt fólkini handan Varðan Pelagic og býráðið á Tvøroyri varug við frammanundan.
Við tað at landsantikvarurin ikki hevur gjørt sína skyldu, so endar tað uttan iva við tí – so sum Malla Dam býráðslimur vísir á – at friðingarmyndugleikarnir gera tí vakra og varðveitingarverduga á bryggjuni á Tvøroyri eina bjarnatænastu við at venda fólkinum ímóti tí, og tá er onki vunnið.
– Spell og sera óheppin umstingarlig handfaring!
