Hann sigur, at ígrein 16 í Stýrisskipanarlógini er ásett, at Løgtingið sjálvt ásetur tingskipan sína, sum inniheldur nærri reglur um málsgongd og skilhald.
– Við støði í hesari áseting hevur Løgtingið samtykt tingskipan sína, har tað í § 14 er ásett, at Formansskapurin er hitt hægra fyriskipaða stýrið í Løgtinginum, og at Formansskapurin viðger mál av grundregluligum og/ella stórum týdningi, m.a. hægri fyriskipaðar spurningar løgtingsarbeiðinum viðvíkjandi.
– Eingin ivi kann vera um, at tað er Formansskapurin, sum tekur avgerð um, hvussu tingarbeiðið skal vera skipað. Tað er hesa heimild, ið Formansskapurin nýtir, tá avgerð er tikin um, at tingmenn, landsstýrismenn, floksskrivarar og umsitingin skulu lata seg kanna fyri Covid-19 fyri at kunna koma í Løgtingið í hesum døgum, sigur Jógvan á Lakjuni, løgtingsformaður.
– Hetta snýr seg ikki einans um at verja fyri, at smitta kemur inn í tingið og leggur tingarbeiðið lamið, men eisini um at fáa staðfest smittuna, um so skuldi verið. Tí aftan á at hava savnast her, fara fólk út aftur í hvør sítt heraðshorn í landinum og kunnu tí gera óbótaligan skaða, um smitta skuldi verið spjadd hiðani. Formansskapurin heldur tí, at hesar kanningar eru neyðugar, tá ið hugsað verður um tann vanda, sum kann standast, um einki verður gjørt, sigur løgtingsformaður.
– Hvørt fólk velja at lata seg kanna, er upp til tey sjálvi at gera av, men sum støðan er í løtuni, má tað vera ein treyt fyri at møta her í Løgtinginum, sigur Jógvan á Lakjuni.
