Landsliðsmálverjin, Annika Fríðheim Petersen og liðfelagarnir í Follo spældu í kvøld dyst á heimavølli í bestu norsku hondbóltsdeildini móti Tertnes.
Tertnes vann ein greiðan 33-24 sigur. Follo var tó væl við í fyrra hálvleiki, og í steðginum var Tertnes bert á odda 15-14.
Talan var um triðja tapið á rað hjá Follo, ið liggur næstaftast í deildini við bert seks stigum fyri 15 dystir.
Annika bjargaði bert níggju prosent av málroyndunum, meðan kappingarneytin, June Cecilie Krogh stóð seg munandi betri í dystinum og bjargaði 30 prosent av málroyndunum.
Komandi leygardag klokkan 15.30 spælir Follo á útivølli móti Molde.
