Fyrr í summar varð nógv gjørt burtur úr, at fólkatalið var farið upp um 49.000 fólk.
Tann 1. august var fólkatalið í Føroyum komið upp á 49.181 fólk. Men tað vardi ikki leingi, tí longu ein mánað eftur, tann 1. september, var fólkatalið fallið niður aftur á 48.979 fólk.
Hetta kom ikki óvart á, tí nettupp august er tann mánaði, tá ið fráflytingin er størst við tað, at nógv ungfólk fara uttanlands at lesa.
Minkingin í august í ár er kortini nógv minni enn vanligt er fyri hendan mánaðin – og tað var hon eisini í fjør.
Árini 2009 til 2013 var nettofráfráflytingin í august oman fyri 400 fólk, men hon var um 200 fólk í august 2014 og 2015.
Sostatt heldur tann gongdin fram, sum vit hava sæð síðstu tvey árini, har fráflytingin er minkandi.
- Tað gjørdi, at gongdin í fólkatalinum vendi til ein lítlan fólkavøkstur í 2013 við 117 fólkum, og ein munandi fólkavøkstur í 2014 við 525 fólkum.
- Hendan gongdin er á leið tann sama nú í 2015.
- Hagstovan sigur, at í tólv-mánaðarskeiðinum frá 1. sept. 2014, til 1. sept. 2015, hevur verið ein vøkstur í fólkatalinum á 510 fólk.
- Tað kemur av einum burðaravlopi á 231 fólk, og eini nettotilflyting á 279 í sama tíðarskeiði, sigur Hagstovan.
