- Fyri Sandoynna kemur undirsjóvartunnilin at merkja, at oyggin fær lut í samfelagsmenningini á jøvnum føti við aðrar partar av landinum.
Tað sigur Brandur Sandoy, borgarstjóri í Sands kommunu eftir almenna tunnilsfundin í Samljóði í Skopun herfyri.
- Vit fara at síggja, at fólkatalið í oynni fer at veksa. Eg vænti, at tað ikki minst vera nýútbúgvin fólk, sum fara at seta búgv í Sandoynni og fara at arbeiða norðan fyri tunnilsmunnan.
Brandur heldur, at Sandoyggin fer at minna um Sandavág, har fólkavøkstur hevur verið. Munurin verður tó, at tað verður nógv stytri at koyra hjá sandoyggjafólki enn hjá vágafólki.
Borgarstjórin heldur, at fasta sambandið eisini kemur at hava avbjóðingar við sær fyri tær tænastur, sum í dag verða veittar í oynni.
- Flytiføri úr og í oynna verður nógv betri, og tí fara fólk at gera meira við at ferðast gjøgnum tunnilin, eitt nú til innkeyp í miðstaðarøkinum. Hetta kemur at leggja eitt ávíst trýst á lokalu handlarnar. Við tað, at fólkatalið kemur at veksa, er eisini væntandi, at keypiorkan fer at veksa.
Brandur Sandoy væntar eisini, at talið av ferðafólki, sum fara at vitja í Sandoynni, verður nógv størri enn í dag, og tí væntar hann, at oyggin fær fleiri tænastur sum servisera ferðafólk.
Sandoyggin hevur millum lítið og einki av vinnuligum aktiviteti, og ein av orsøkunum er, at tað er dýrt og trupult at flyta vørur í og úr oynni.
- Tá tunnilin verður veruleiki, verður einki til hindurs fyri, at eitt nú alivinnan kann brúka oynna meiri til sínar aktivitetir við eitt nú kryvjing, smolti og øðrum.
Borgarstjórin heldur, at umstøðurnar annars at hava vinnu í Sandoynni eru framúr.
- Vit hava nógv vinnuøki til sølu fyri heilt bíligan penga, men atkoman er tað sum forðar menningini í dag. Vit hava nú fimm ár at gera okkum klár til, at koyrandi verður undir Skopunarfirði, sigur Brandur Sandoy.
