Risastóra grønlendska fiskivinnufyritøkan Royal Greenland hevur havt aðalfund. Tað er grønlendska landsstýrið, sum eigur felagið, og sum hevur gjørt av at velja Johannes Jensen í Havn sum nýggjan nevndarlim.
Johannes Jensen er stjóri í Gist & Vist, sum eigur Hotel Føroyar-samtakið við fleiri hotellum og matstovum. Hann hevur eisini yvir 12 ára royndir sum nevndarlimur í Bakkafrost og í nógv ár var hann sølumaður og marknaðarmaður hjá Føroya Fiskasølu.
Nýggja nevndin í Royal Greenland sær soleiðis út:
Maliina Abelsen, forkvinna
Niels Harald De Coninck-Smith
Johannes Jensen
Susanne Christensen
Arnannguaq Holm Olsen
Jesper Højer
Hesi fóru úr nevndini á aðalfundinum:
Karsten Høy
Tina Lynge-Smith
Regine Møller
##med2##
Á aðalfundinum herfyri legði felagið fram roknskap fyri 2021, sum hevði 326 milliónir krónur í avlopi – áðrenn sølu av trolarum.
Umsetningurin hækkaði 16 prosentstig til 6,64 milliardir krónur. Á aðalfundinum varð eisini gjørt av, at felagið skal lata eigaranum, grønlendska landsstýrinum, 112 milliónir krónur í vinningsbýti.
##med3##
Eisini varð gjørt av á aðalfundinum, at tað framyvir verður Maliina Abelsen, sum skal standa á odda fyri nevndini, sum merkir, at felagið bæði fær nýggjan stjóra og nýtt nevndarforfólk í ár.
Í januar boðaði nevndin í Royal Greenland frá, at Mikael Thinghus leggur frá sær stjórastarvið í summar, sum hann hevur røkt seinastu 11 árini. Maliina Abelsen tekur yvir sum forkvinna eftir Niels Harald de Coninck-Smith, sum hevur sitið í sessinum síðani 2010. Hann heldur fram í nevndini.
Landsstýrismaðurin í íbúðar- og samferðslumálum, Erik Jensen, gjørdi í síni røðu greitt, at nýggi stjórin skal búgva í Nuuk.
##med4##