Tá ið Russland gjørdi innrás í Ukraina, varð tað skjótt sjón fyri søgn, at føroyingar stóðu við opnum ørmum og tóku ímóti flóttafólkum úr Ukraina. Fleiri flóttafólk eru eisini komin til Føroya og fyribils hevur landsstýrið fyrireikað seg til at eini 200 flóttafólk úr Ukraina koma til Føroya.
Javnaðarflokkurin á Fólkatingi hevur gjørt eina spurnarkanning um hesi viðurskifti og sambært henni, er tað at kalla í fullum samsvari við fólkaviljan í Føroyum, at flóttafólk úr Ukraina koma hendavegin. Kanningin vísir nevniliga, at heili 85 prosent av føroyingum halda, at flóttafólk úr Ukraina eisini skulu sleppa til Føroyar og tað eru bara sjey prosent sum siga beinleiðis nei. Samstundis eru tað átta prosent, sum ikki hava nakra ávísa meining um hetta.
Men so stór er føroyska vælvildin ikki ímóti flóttafólkum úr øðrum londum. Kanningin vísir nevnilga, at yvir helvtin av føroyingum, ella 52 prosent av føroyingum, vilja ikki, at vit skulu taka ímóti flóttafólkum úr Miðeystri ella úr Norðurafrika.
Hinvegin eru tað 30 prosent, sum eisini vilja taka ímóti flóttafólk úr hesum pørtunum av heiminum og 18 prosent vita ikki.
