Tað verður alsamt meiri og meiri at gera í Føroyum.
Hetta sæst á tølunum yvir lønarútgjaldið í teimum ymsu vinnunum.
Tey feskastu tølini hjá Hagstovuni vísa, at føroyingar hava fingið 140 milliónir meiri í løn teir fyrstu átta mánaðirnar í ár, afturímóti sma tíðarskeiði í fjør.
Tølini vísa, at frá januar til august í ár, vóru lønargjaldingarnar 2.410 milliónir krónur, afturímóti 2.270 milliónir sama tíðarskeið í fjør.
Lønargjaldingarnar hækka næstan yvir ein kamb, men enn eru tað í summum vinnugreinum, at tær minka.
T.d. minkaðu tær 10% í landbúnaðinum fyrstu átta mánirnar í ár.
Meiri hugvekjandi er tað kanska, at lønargjaldingarnar í fiskivøruídnaðinum eru minkaðar 12% fyrstu átta mánirnar í ár, afturímóti í fjør.
Men hinvegin eru lønargjaldingarnar til fiskimenn øktar úr 395 milliónum fyrstu átta mánaðirnar í fjør til 419 milliónir sama tíðarskeið í ár. Tað er 6%.
Í alingini er vøksturin 10%, og í vinnuligum tænastum er vøksturin 16%. Áðhugavert er eisini, at úgjaldingarnar hjá gistingarhúsum og matstovum hækkaðu 12%.
Nógv tann størsti vøksturin er í privatu byggivinnuni, sum vaks heili 44%, úr 44 milliónum fyrstu átta mánaðirnar í fjør, uppí 66 milliónir sama tíðarskeið í ár.
Framleiðslan minst
Verður vinnan býtt sundur í bólkar, sæst, at teir átta fyrstu mánaðirnar í ár, er tann størsti vøksturin í bygging, handli, flutningi og tænastuvinnuni
Í hesum vinnunum, eru lønargjaldingarnar hækkaðar 65 milliónir í januar til august í ár. Tað eru 7%.
Næstan líka nógv eru lønargjaldingarnar í almennum tænastum hækkaðar.
Tær eru hækkaðar 54 milliónir ella 7%.
Vøksturin er úr 823 milliónum fyrstu átta teir mánaðirnar í ár, til 877 milliónir í ár.
Minst eru lønargjaldingarnar hækkaðar í framleiðsluvinnuni, 16 milliónir, ella 2%.
Áhugavert er eisini, at lønargjaldingarnar hjá tí almenna eru væl størri enn tær í framleisluvinnuni og í byggivinnuni, handilsvinnuni, flutningsvinnuni og øðrum, privatum tænastum.
Men í 1991 var øvugt. Tá vóru lønargjaldingarnar íhjá tí almenna 1320 milliónir, men tær vóru 1421 í framleiðsluvinnuni og 1395 milliónir í øðrum, privatum vinnum.
Men so tók kreppan rættiliga yvirhond og almennu tænasturnar fóru uppum. Báði í 1993 og 1994 vórðu almennu tænasturnar skerdar, men síðani eru tær hækkaðar aftur.
