- Á ólavsøku skal eg arbeiða eina rúgvu. Í gjár arbeiddi eg í 13 tímar, í dag skal eg arbeiða í 17 tímar, og í morgin vóni eg bara at skula arbeiða í 10 tímar, sigur Marnar, ið hevur arbeitt sum kokkur á Hotel Tórshavn í eitt lítið ár.
Marnar hevur havt eitt framúr ár, tá hugsað verður um renningina. Í januar var hann í Íslandi og setti innanduramet í 1500 og 2000 metrum. Fyri kortum var hann á Bermuda, har hann vann føroyingum tvær bronsumedaljur á ávikavist 10.000 og 5.000 metrum. Til slík úrslit kemur man ikki sovandi til.
- Eg venji hvønn dag. Í gjár arbeiddi eg til klokkan 3, men hóast tað var eg uppi tíðliga í morgun og rann ein tíma, áðrenn eg fór til arbeiðis, sigur ein ógvuliga málrættaður og disiplineraður Marnar.
Ólavsøkan hjá Marnari verður ikki nógv meira enn arbeiði.
- Eg havi ikki tíð til nógv annað enn at arbeiða. Men tá eg fái frí um 10 tímar fari eg nokk ein túr gjøgnum býin at hitta fólk, sigur Marnar, ið tó sigur seg ikki sakna ólavsøkulívið tað stóra.
- Tað mest týdningarmikla hevur longu verið, og tað var ólavsøkurenningin í gjár. Satt at siga var tað bara hana, eg ikki vildi forsøma, sigur Marnar.
Óneyðugt at siga so vann Marnar ólavsøkrenningina greitt við tíðini 15.59.
