Mikael Blak er nýggjur formaður í Faroe Music Export (FMX), sum er útflutningsstovnur fyri føroyskan tónleik.
Haraftrat heldur Gunn Hernes fram í stýrinum. Nývald eru Elin Brimheim Heinesen og Leivur Thomsen.
Hetta hevur Høgni Hoydal, landsstýrismaður í uttanríkis- og vinnumálum, gjørt av.
– Eg vil takka Gissur Patursson, sum var fyrsti formaður í tónleikaútflutningsstovuni, og Unn Paturson fyri tykkara stóra og týðandi arbeiði, føroyskum tónleikaútflutningi at frama, og ynski stýrinum, sum nú tekur við, hepna hond í starvinum og blíðan byr, sigur Høgni Hoydal.
FMX virkar fyri at fáa føroyskan tónleik og føroyskar tónleikarar fram uttanlands.
Glenn Larsen, sum er ættaður úr Noregi, er leiðari fyri FMX.
