Lena Anderssen gjørdist toppskorarin á FMA í kvøld, við trimum virðislønum, umframt at maður hennara, Niklas Johannesen, fekk eina fyri útgávu hennara. Eagle In the Sky fekk tilsamans fýra virðislønir. Hon fekk virðisløn fyri ársins húsa og sum ársins útgáva í popp/rokk bólkinum, meðan Lena Anderssen varð kosin ársins songkvinna innan popp/rokk og Niklas Johannesen ársins framleiðari.
Útgávan At the Heart of a Selkie hjá Eivør gjørdi eisini um seg. Umframt at Eivør fekk eina virðisløn fyri ársins einstaklingur í opna bólkinum, bleiv útgávan kosin sum ársins konsert ella útgáva í opna bólkinum. Eisini fekk Marjun Syderbø Kjælnes virðislønina fyri ársins tekst fyri sangin Verð Mín, sum hon skrivaði til At the Heart of a Selkie.
Danny & The Veetos og Konni Kass fingu hvør sínar tvær virðislønir. Alright hjá Danny & The Veetos bleiv ársins sangur, meðan Danny & The Veetos eisini blivu kosnir ársins bólkur. Konni Kass bleiv kosin ársins nýggja navn og fekk eisini heiðurin ársins loftbrúgv.
Orka varð kosin ársins bólkur í opna bólkinum, meðan Symphony no. 2 – The Earth Anew hjá Sunleifi Rasmussen varð ársins kompositión.
Heiðrikur á Heygum varð ársins sangari, meðan Hans Andrias fekk áhoyraravirðislønina. GUT Productions fekk heiðurin fyri ársins videolag. Tey framleiddu lagið til sangin Einaferð var tað eg.
Ársins tónleikaheiður varð givið Branduri Øssursson, meðan Listastovan í Vágum varð kosin ársins átak.
