Kavin argar sjálvandi eisini flúgvingina til og úr Føroyum. Morgunflogfarið úr Keypmannahavn fekk ikki lent og er farið til Keflavíkar.
Allar fráferðirnar í dag eru fyribils útsettar til eftir klokkan 18.00, meðan flogfarið úr Keypmannahavn seinnapartin og tað, ið fór til Keflavíkar í morgun, væntast í Vágar, tá veðrið batnar.
Rasmus Niclasen, ferðslusamskipari hjá Atlantsflog, sigur, at sum nú er, er ikki flúgvandi.
- Tað kavar her vesturi og vøllurin er undir í kava. Ruddingartoymið bíðar, til ælið er av, áðrenn teir fara at rudda, so vit mugu eisini bíða, sigur hann.
Annars sigur hann, at tað letur til at klárna í júst nú, so kanska verður vøllurin ruddaður skjótt.
- Eitt flogfar úr Vágum er á veg og vónandi fær tað sett seg, um tað nú veruliga klárnar í. Hitt flogfarið er í Keflavík, og haðani er einans ein tími til Føroya, so teir standa bara og bíða, sigur Rasmus Niclasen.
Rasmus Niclasen sigur, at allar fráferðir eru útsettar til eftir klokkan 18.00.
- Nú er trupulleikin, at tað er sera torført hjá fólkum yvirhøvur at koma vestur á flogvøllin. Tí verða vit noyddir at útseta, hóast flogførini kanska megna at seta seg seinnapartin, sigur Rasmus Niclasen.
Myndir: Send okkum kavamyndir á kavi@in.fo.
