Tað sigur seg næstan sjálvt, at ein flogskipari skal vera vakin, tá hann situr frammi við stýripinnin. Er hann ikki tað, kann tað fáa sera álvarssamar avleiðingar, so sum tá eitt flogfar datt niður í India fyri einum hálvum ári síðani.
Flogfarið hevði flogið tríggjar tímar, tá vanlukkan hendi, og kanningar hjá myndugleikunum vísa, at tann royndi flogskiparin hevði sovið næstan alla tíðina. Hann hevði tí ikki hoyrt ávaraingar frá eftirlitinum, sum hevði biðið hann broyta kós.
Úrslitið var, at flogfarið rakti ikki lendingarbreytina í Mangalore, men endaði niðri í einari lægd, har eldur kom í tað.
166 fólk vóru í flogfarinum. Bara átta sluppu við lívinum.
