Higartil hava amerikonsku feløgini Delta Air Lines, American Airlines og US Airways, franska Air France, niðurlendska KLM, skandinaviska SAS og norska Norwegian steðgað flúgvingini til Ben Gurion-floghavnina í Tel Aviv.
Tey evropeisku feløgini hava tikið avgerðina, eftir at loftferðslutrygdarmyndugleikarnir í Evropa hava mælt feløgunum frá at brúka floghavnina í Tel Aviv fyribils.
Sambært CNN hava tey amerikonsku feløgini tikið somu avgerð, eftir at ein rakett hjá Hamas kom niður nærhendis Ben Gurion-floghavnini í dag. Tíðindastovan AP skrivar, at rakettin fekk eitt flogfar hjá Delta Air Lines at venda og at seta seg í París. Flogfarið var tá statt yvir eystara parti av Miðjarðarhavinum. 300 fólk vóru umborð.
Teir ísraelsku loftferðslumyndugleikarnir eru misnøgdir við avgerðina hjá flogfeløgunum.
-Tað er eingin orsøk til at gevast við at flúgva til Ísraels. Hetta er at samsýna teimum, sum fremja yvirgang, sigur ein talsmaður fyri Ben Gurion-floghavnina við CNN.
