Umleið 80 fólk hava fingið skaða, men eingin er eftir øllum at døma deyður í einum flogfari, sum datt niður í Meksiko.
Eitt ferðafólkaflogfar við 101 fólkum umborð datt seint í kvøld niður í Meksiko. Tað upplýsir flogfelagið Aeromexico sambært Reuters tíðindastovuni.
Flogfarið er sambært myndugleikum á staðnum dottið niður beint eftir at tað fór á flog á einum flogvølli við býin Durango norðralaga í Meksiko.
80 fólk eru særd í flogvanlukkuni, upplýsir ein talsmaður fyri sivilverjuna.
Men eingin er eftir øllum at døma deyður, sigur guvernørurin í Durango á Twitter.
97 ferðafólk vóru við flogfarinum og manningin taldi fýra, skrivar meksikanski flutningsmálaráðharrin á Twitter.
Talan er um eitt ferðafólkaflogfar av slagnum Embraer 190, sum er dottið niður.
Ein tíðindamaður frá AFP hevur sæð fleiri særd ferðafólk koma úr flogfarinum, sum var sveipað í gráum royki, skrivar AFP.
/ritzau/
