Nógv kundi bent á, at kappingin í Eikliguni hjá kvinnum verður fult so spennandi í vetur, sum hon hevur verið tað undanfarnu árini. Tá hevur Mjølnir verið oddalið frá byrjan til enda og uttan nakran slingur í valsinum, men nú eru altso tveir seriøsir avbjóðarar.
Mikukvøldið fæst kanska enn ein ábending um, um veturin verður so spennandi, sum tey óheftu og tey, sum ikki halda við Mjølni, kanska royna at vóna, tí tá verður dystur í Kollafirði millum júst KÍF og Mjølnir. Vinnur Mjølnir har, er gloppið enn størri, men vinnur KÍF, er møguleiki fyri enn meira spenningi.
Um vikuskiftið livdu tey trý fremstu liðini upp til sínar favorittleiklutir, tí Fleyr vann á útivølli ímóti bæði ÍF og Drátti, umframt at Mjølnir úti vann á Ternuni, hóast tað heldur óvæntað bleiv ein fimmsettari, og KÍF á heimavølli gjørdi slætt borð ímóti SÍ.
Soleiðis sum kappingini hjá kvinnunum hevur háttað seg higartil, er stigatalvan eitt sindur øðrvísi á at líta, enn hon plagar, tí summi lið hava tikið seg nógv fram og onnur eru dragnað nógv.
Fyrst og fremst er tað stuttligt at síggja, at KÍF blandar seg upp í oddastríðið, tí seinnu árini hava ungu kollfjarðakvinnurnar verið botnproppur, men nú gongur nógv upp í eina hægri eind, so tingini rigga og geva úrslit.
Hinvegin er SÍ, sum plagdi at vera partur av oddastríðnum, dottið heilt niður í tyngra endan, har bara Ternan í løtuni er aftari. Men so eru afturfyri lið sum Dráttur og TB kanska heldur stinnari, enn tey vóru tað í fjør, so enn sær nógv rættiliga opið út.
