Nú skulu øll tey smáu valstøðini niðurleggjast.
Tað ger Annika Olsen, landsstýriskvinna, nú greitt.
Helgi Abrahamsen, tingmaður fyri Sambandsflokkin, hevur spurt hana, hvussu gongst við ætlanini at niðurleggja smáu valdømini.
Ætlanin er at niðurleggja tey smáu valdømini, tí mett verður, at tey lúka ikki treytirnar fyri at valið skal vera loyniligt, sum er ein meginregla í vallógini.
Annika Olsen sigur, at eftir ólavsøku fer hon at leggja uppskot fyri løgtingið um at onki valstað kann hava færri enn 100 veljarar.
Samstundis kunnu kommunur ikki býta kommununa sundur í fleiri valstøð uttan so at hvørt valstað hevur minst 100 veljarar.
Viðvíkjandi fólkatingsvali er mannagongdin tann, at landssytýrið heitir á danska innanríkismálaráðharrin um at broyta kunngerðina um valstøð og so ger hann tað.
Samstundis sum at valstøðum verða niðurløgd, fáa fólk á útoyggj rætt at atkvøða við brævatkvøðu.
Ætlanin er ikki at broyta valskipanina soleiðis at atkvøður kunnu flytast ímillum valstøð áðrenn tær vera taldar upp. Hinvegin heldur hon, at tað hevur alstóran týdning at fyrsta uppteljingin fer fram á staðnum og at almenningurin hevur høvi at fylgja við í, at alt fer rætt fram og tí skal fyrsta uppteljingin verða á staðnum.
So vítt, vit hava fingið uppspurt, eru tað hesi valstøðini, sum sostatt verða niðurløgd í næstum:
Mykines 11 veljarar
Hellurnar 13 veljarar
Hattarvík 14 veljarar
Elduvík 15 veljarar
Hestur 18 veljarar
Kirkja 25 veljarar
Gjógv 26 veljarar
Dalur 28 veljarar
Svínoy 29 veljarar
Mikladalur 36 veljarar
Árnafjørður 37 veljarar
Húsar 38 veljarar
Skúvoy 39 veljarar
Funningsfjørður 44 veljarar
Funningur 47 veljarar
Kunoy 50 veljarar
Haraldssund 52 veljarar
Tjørnuvík 52 veljarar
Húsavík 66 veljarar
Skálabotnur 70 veljarar
Sandvík 75 veljarar
Fámjin 81 veljarar
Lopra 87 veljarar
Hov 92 veljarar
