Tapan Chowdhury, ráðharri, sum millum annað umsitur náttúruvanlukkur, sigur við BBC, at higartil hava myndugleikarnir fingið góðar 700 mió. krónur í stuðuli úr øðrum londum. Av hesum er nógv tann størsti parturin komin úr Saudiarabia, men lond sum Bretland, USA og Noreg hava eisini veitt hjálp. Pengarnar hava myndugleikarnir brúkt til at útvega neyðstøddum í fjarskotnum bygdum mat, vatn og heilivág, sigur hann.
Men tørvurin á mati er stórur, og hjálparfelagsskapir siga søgur um, at í summum bygdum fram við strondini eru fólk farin til hendurs um rís, tí eingin hjálp er komin hagar enn.
- Vit hava einki at eta, men vit royna at halda okkum á lívi við onkrum, sum vit finna, og sum kann etast, sigur eitt eygnavitni við BBC.
Teir størstu hjálparfelagsskapirnir vænta, at talið á deyðum eftir tropisku ódnina fer at koma upp á 15.000. Myndugleikarnir siga, at umleið 500.000 hús eru løgd í oyði, og at 845.000 onnur hús hava fingið stóran skaða.
