Iranskir miðlar skriva í dag um tvær spreingingar, sum vóru nærindis staðnum í Kerman, har Qassam Soleimani liggur jarðaður.
Qassam Soleimani var fyrrverandi leiðari hjá elituherinum í iransku kollveltingarhirðuni.
Hann læt lív í einum amerikanskum dronuálopi í Irak í januar 2020, og í dag varð minningarhald á staðnum, har hann liggur jarðaður.
Iranskir miðlar vita at siga, at spreingingarnar vóru við stuttum millumbilum, meðan hátíðarhaldið varð, og í minsta lagi 50 fólk lótu lív.
Myndugleikarnir í Iran siga, at talan var um eina yvirgangsatsókn, skriva norsku miðlarnir, Dagbladet og NTB.
Dagføring:
Tey nýggjastu tølini úr Iran siga nú, at í minsta lagi 103 fólk eru deyð av spreingingunum, og talið av særdum er komið upp á 141.
Sagt verður, at fleiri hundrað fólk vóru savnað fyri at minnast ársdagin, tá Qassam Soleimani læt lív í amerikanska dronuálopinum í Irak.
