Í næstum fáa føroyingar kanska tilboð um regluligar kanningar fyri fleiri sløg av krabbameini. Tað sigur Karsten Hansen, landsstýrismaður í heilsumálum. Eyðgunn Samuelsen, tingkvinna fyri Javnaðarflokkin, hevur spurt hann, hví føroyingar ikki fáa tilboð um regluligar kanningar fyri krabbamein í langa og baktarmi, soleiðis sum danska Heilsustýrið hevur mælt til?
Karsten Hansen staðfestir, at tilvísingarbólkurin fyri yvirlitskanningar, screening, á Landssjúkrahúsinum hevur umrøtt spurningin í summar og metti tá, at sum heild er tað ein áhugaverd og ynskilig skipan, sigur Karsten Hansen.
Men samstundis metti bólkurin, at tað ikki var ráðiligt at seta skipanina í verk við verandi manning á Landssjúkrahúsinum
Málið hevur síðani verið umrøtt ímillum Landssjúkrahúsið og Heilsumálaráðið, og landsstýrismaðurin sgur, at hann fer at taka málið upp í krabbameinsstýrisbólkinum, sum fer at hava fund í næstum um yvirlitskanningar í føroyska heilsuverkinum.
Karsten Hansen leggur afturat, at á fíggjarlógini fyri næsta ár, hevur hann sett pening av til at heilsuverkið kann fara undir landsumfatandi yvirlitskanningar fyri bróstkrabba í Føroyum.
Somuleiðis hevur Landssjúkrahúsið hevur sent landsstýrismanninum eitt tilmæli um at dagføra skipanina við yvirlitskanningum fyri lívmóðurhálskrabba, soleiðis at fleiri aldursbólkar fáa tilboðið um kanningar, akkurát sum tey hava í Danmark. Eisini hendan spurningin fer Karsten Hansen at taka upp í krabbameinsstýrisbólkinum í næstum.
|
